الرئيسية شخصيات نوافذ دوت نت تحاور الفنانة نسمة تاجوج (بنت البشير )

نوافذ دوت نت تحاور الفنانة نسمة تاجوج (بنت البشير )

1 دقيقة قراءة
0
198

منذ الصغر احلم ان اصبح رئيسة دولتي
حوار : عمر الشيخ
الفنانة السودانية من اصول تركيه المثيرة للجدل شجن المشهورة بلقب (بنت البشير) التي اشتهرت بفيديو وجهت فيه رسالة للشعب السوداني بعد خروجه في ثورة شهد لها العالم اجمع ضد فساد حكومة المؤتمر الوطني نجحت تلك الثورة في سقوط البشير.
قدمت نسمة تاجوج اعتذار للشعب السوداني مباشرة عن حديثها ايام الاعتصام بالقيادة العامة واوضحت انه ليس لعموم الشعب السوداني وإنما لاصحاب الاجندة الخاصة وقالت طموحها ان تصبح رئيسة لجمهورية السودان درست تاجوج علم نفس بالاضافة للعلوم العسكرية وحققت شهرة في الوسط الفني لمعرفة الكثير من المعلومات نتابع الحوار التالي .
اولا حدثينا عن نفسك؟
انا نسمة بيومي الشهيرة ب(نسمة تاجوج او بت البشير)
درست بكلاريوس علم نفس ودبلوم علوم عسكرية وسياسية
العمر (الاعمار بيد المولى) من اب تركي الجذور وام محسيه
*تجربتك الفنية ؟
تجربة مريرة جدا من بدايتها ورفض تام من الاهل الا بسياستي الخاصة قدرت اقنعهم بهوى المزيكا والغناء ومرات مابحب اغني مزاج كده ومرات ممكن احي تلاتة حفلات في اليوم
*فنان او فنانة ترك بصمة في شجن ؟
اسرار بابكر
علاقتك بالمطبخ ؟
(نمبر ون ) وخصوصا الحلويات والفطائر لانه اطفالي بحبوها
هوايات مختلفة ؟
الرسم ورسم الحنا والميك اب لانو شغلتي التانية ميك اب ارتيست
*الرياضة في حياتك؟
ماعندي علاقة بيها الا مرات المشي نص كيلو فقط
*الفن في زمن الكورونا؟
الا البروفات والجلسات مع بعض الزملاء والحفلات الصغيرة جدا
ماهو تاثير الحجر الصحي على عملك الفني ؟
تاثير كلي لكن ماملتزمة بيه وعندي تصريح وبطلع عادي لاني مامقتنعه بشي اسمه كرونا في السودان
هل كسرتي الحجر باقامة حفل ؟
كسرته بدعمي لوجبات الغلابة بمشي زي الساعة عشرة بوزع الوجبات اهم شي (غلابتي اتعشو) عشان اقدر انوم مرتاحه.

* لحظات فرح عالقة بذاكرتك ؟
حين انجاب اطفالي

* متى تحزن نسمة تاجوج ؟

لمن اقصر في جمعيتي لدعم الغلابة حين هجوم السودانين علي بعضهم والتنمر حين العنصرية وعدم التسامح وروح الانتقام بينهم وعدم تقبل الراي والراي الاخر واسقاط راي الغير.
السياسة في حياتك ؟
السياسة نجاسة
في احلام طفولتي كنت احلم باني رئيسة السودان.
*ما هو سر اسم الشهرة نسمة تاجوج ( بنت البشير)
من الفيديو الشهير عندما تحدثت في عدم الخروج على البشير وخاطبت الشعب وقلت ليهم اعتبروا ابوكم ومرات الوالد في البيت بنختلف معاهوا وقلت البشير ده ابونا واطلق علي (بنت البشير)وانا اعتز بذالك.
*رأيك في الثورة السودانية ودورك فيها ؟

انا من كنت في الجامعة ضد حكومة الانقاذ الى حين يوم الاعتصام فوجد الدعم من العملاء للاعتصام فالعملاء لايدعمون الا اذا كانت هنالك مصالح شخصية فربنا حبانا بالعقل لنميز الخير من الشر ففكرت على المدى البعيد ان التغيير سوف يدمر البلاد لان السودان مطمع للاخرين .
فوقفت وقفة عشرين رجل وانا متاكدة من نقد الشعب والعملاء الذين يميزون باغتيال الشخصيات ولساني حالي بقول (اسمع كلام ببكيك ماكلام البضحكك ).
فكان الدمار الحالي الملموس ودعواتنا انه ربنا ارفع البلاد.
* هنالك اخرون لهم نظرة اخرى غير نظرتك ورايك ؟
من حق اي مواطن يعبر عن رايه ومطالبه البتناسب طموحه دوري في الثورة قلت للناس مايغيروا النظام بضر البلد وفعلا فئة من الناس قالوا ياريتنا سمعنا كلامك في النهاية مابحب خراب البلد.
*امنية تحققت واخرى لم تتحقق؟
الاماني كلها تحققت ماعدا اني اكون رئيسة السودان.
اشياء لا يعرفها عنك الجمهور؟
حسن النية
رسالة للفنانين الشباب؟
بعض الفنانين خلو الحقد واغتيال الشخصيات.
هل هنالك تواصل بينك وبين اهل الوالد في تركيا؟
نعم
فنان يطرب شجن؟
الحوت
علاقة علم النفس ودخول لعالم الغناء؟
احب ذالك العلم الراقي لانه علم جميل ويجب علي كل دارس ان يتعلمه لانه بساعد في فهم الشخصيات وبفك ليك الرموز البتواجهك في الحياة يعني الناس تاني من خلال تعابير وجهها وكلامها وحركات جسدها بكونوا كتاب مفتوح ليك الان اصدقائي بخافوا مني هههه عشان بعرفهم مالهم من خلال نظرتي بس في وجوههم

* اذا رجع بيك الزمن للوراء هل كنتي ستتحدثين عن الشعب السوداني بما قلتيه سابقا؟

نعم لاني كنت اقصد فئه معينة في الشعب السوداني بس الغلط لم استخدم كلم بعض الشعب السوداني الفيديو طلع لي من الاعداء اصدقاء ومن الاصدقاء اعداء وبجد في ناس محترمين ومثقفين جدا.

*ماهو شعورك تجاه ردت فعل الشعب السوداني على الفيديو الذي نشرتيه ؟
الغلط مابعالجوا بالغلط انا من مسكت المايك الناس بتتنمروا علي وكسروا مجاديفي ونعتوني بالفاظ جارحة جدا والمجرم يصنعه المجتمع الشعب السوداني طيب بس بحبو التنمر لمن اتعاديت منهم وبقيت اغني في الهجاء.
كيف تم قبول اعتذارك ؟
الاعتذار شيمة العظماء واعتذرت اثر ضغط اصدقائي المقربين كنت علي خلاف معاهم اني كيف اعتزر علي مجرد راي وحرية الراي من حقي اني اقول راي ومن حقي علي الناس احترام رايي او النقاش في حدود الود.

يتهمك البعض بانك كوزه تتبعي للنظام السابق؟
نعم ومازالوا يتهموني بذلك هذه تعتبر اجندة الشيوعين هي اغتيال شخصيات كل من يخالفهم الراي وجدادهم الالكتروني وانا اشك بل متاكدة ان الحملة التنمرية دي قامت بيد الشيوعيين والقحاتة ليس الشعب السوداني لانه الشعب يدرك من حوله وبعدين انا طول حياتي عايشة في ابو ظبي كيف اكون كوزه واهلي ربنا منعم عليهم وعايشة عيشة توازي الارستقراطية لا اكترث لمال الدولة فقط كنت اتمني اكون كما قلت انفآ باني منذ الصغر احلم ان اصبح رئيسة دولتي حتى اجعل السودان رمزا للجمال ومازال حلمي يراودني.
* ماهو رأيك الحالي في البشير بعد ان تم كشف فساده وتمت إدانته من قبل المحكمة ؟
كما قلت لك سابقا السياسة (نجاسه) وانا احترمه في شخصه واحس من تعابير وجهه انه مظلوم يمكن لاني عاطفية ومن خلال عاطفتي الزايدة الاشخاص المغربين لي نصحوني ان ادمج عاطفتي بعمل خير لذلك جسدتها في جمعيتي الخيرية (سفيرة الغلابة)
*شاعر يحرك مشاعرك؟
الكوباني

تحميل المزيد من المقالات ذات الصلة
تحميل أكثر من الصحفي عمر الشيخ
تحميل المزيد في شخصيات
التعليقات مغلقة.

راجع ايضا

أسطورة الكرة السودانية في الثمانينات “تنقا” بعد التقاط صورة له اليوم

أعاد رواد مواقع التواصل الاجتماعي، ذكريات امجاد أسطورة الكرة السودانية في الثمانينات، منصو…